Profili Gjinor i Kosovës për Bujqësi dhe Jetesën në zonat rurale ofron një analizë të thelluar të çështjeve të lidhura me gjininë brenda sektorit të bujqësisë në Kosovë, duke përfshirë ndikimin e digjitalizimit. Raporti ofron rekomandime të bazuara në fakte që synojnë përparimin e barazisë gjinore dhe fuqizimin ekonomik të grave në bujqësi dhe në zhvillimin rural, me fokus në strategji gjithëpërfshirëse digjitale.

Kjo analizë u shkrua nga Rrjeti i Grave të Kosovës (RrGK) dhe u kontraktua nga Organizata e Ushqimit dhe Bujqësisë e Kombeve të Bashkuara (FAO). Studimi u zhvillua duke përdorur metodologjinë e Vlerësimit Gjinor të FAO-së, që përfshiu një kombinim të hulumtimeve, një anketë statistike përfaqësuese të ekonomive familjare rurale në të gjithë Kosovën, intervista dhe grupe fokusi të zhvilluara në vitin 2022.

Gjetjet kryesore tregojnë se, ndërsa kuadri ligjor i Kosovës për barazinë gjinore në përgjithësi përputhet me standardet ndërkombëtare, ligjet dhe strategjitë specifike që lidhen me bujqësinë, zhvillimin rural dhe ndryshimet klimatike nuk përmbajnë mjaftueshëm analizë gjinore dhe hapa drejt barazisë gjinore. Raporti vë në pah çështje të tilla si pjesëmarrja e ulët e grave në tregun formal të punës, pabarazitë gjinore në arsim dhe qasjen në burime, si dhe ndikimi i rëndësishëm i migrimit në jetesën në zonat rurale.