Organizata anëtare e Rrjetit të Grave të Kosovës (RrGK), Artpolis, nga data 1-6 tetor, në Prishtinë mbajti festivali ndërkombëtar të artisteve dhe aktivisteve, “FemArt”.
Motoja e këtij edicioni, të nëntit me radhë, ishte “F… Seksizmit”, si mënyrë për të arritur barazinë politike, ekonomike, kulturore, personale dhe atë shoqërore.
Festivali u hap me sfilatën e dizajneres Yllka Brada, “Fall21 seksizmi”, dhe koncertin “Kthimi te rrënjët”, për të vazhduar ditën e dytë me punëtori për feminizmin, ekspozitën “Breathe”, si dhe performanca të ndryshme online dhe në teatër.
Dita e tretë e festivalit mblodhi dashamirësit e filmit në “Kino Armata”, ku u shfaqën filma dhe dokumentarë si: “The Eichmann Project – Terminal 1”, “Neo & Doku Movies”, “Nobody needs her”, Four Mothers”, dhe “Zgjoi”.
Po ashtu, në kuadër të “FemArt” u bë publikimi i hulumtimit: “Thirrje për veprim: Adresimi i seksizmit, ngacmimit dhe ngacmimit seksual” të shkruar nga Dr. Ariana Qosaj-Mustafa, njëherit kryetare e Bordit të RrGK-së.
Me këtë rast u vë theksi te nevoja që seksizmi të largohet nga shoqëria jonë, e në veçanti nga mediat e nga jeta kulturore.
Raporti u pasua nga paneli i diskutimit me temën “Reagimi institucional dhe shoqëror ndaj seksizmit”, pjesë e së cilit ishte edhe Drejtorja Ekzekutive e RrGK-së, Igballe Rogova. Mes terash, Rogova kujtoi se seksizmi i ka rrënjët thellë, duke filluar që nga familja, tekstet shkollore, e mediat.
Ajo gjithashtu bëri thirrje që seksizmi të luftohet me çdo kusht përmes fushatave, raportimit, dhe reagimeve institucionale.
Kurse, dita e pestë dhe e gjashtë e festivalit sollën për publikun vallëzim, aktivizëm përmes poezisë, performanca teatrore, si dhe podcast feminist.
Shumë nga performancat e këtij edicioni, mund t’i gjeni online në faqen e FemArt.
“FemArt” është organizim feminist që mëton ta revolucionarizojë artin dhe të shkatërrojë normat patriarkale përmes tij.
LEXO EDHE: “Me liri kundër marres” Festivali FemArt shënoi edicionin e 7-të
Fotografitë: FemArt, Facebook
