Ne, Rrjeti i Grave të Kosovës, ftojmë të gjithë pa dallim moshe, prejardhjeje apo komuniteti, të angazhoheni aktivisht në forcimin e lëvizjes feministe në Kosovë. Ne besojmë se sa më shumë njerëz të përfshihen, aq më shumë zëra do të dëgjohen dhe ndryshimi i vërtetë do të ndodhë. Ky është momenti për t’u bërë bashkë, për ta sfiduar pabarazinë dhe për të ndërtuar një shoqëri ku barazia gjinore nuk është vetëm një synim, por një realitet.

Përmes Programit tonë të Vullnetarëve, ne ofrojmë një hapësirë për të mësuar, avokuar dhe vepruar. Qoftë si hulumtues, aktivistë, studentë apo thjesht dikush që ka pasion të drejtat e njeriut, përfshirja juaj mund të sjellë ndryshim. Duke u bërë pjesë e jona, do të keni mundësinë të fitoni aftësi të reja, të kontribuoni në hulumtime dhe të thelloni njohuritë tuaja mbi sfidat me të cilat përballen gratë në Kosovë, si dhuna në baza gjinore, pabarazia ekonomike dhe diskriminimi sistematik.

Gjatë viteve, kemi angazhuar të paktën 392 vullnetarë të ndryshëm nga Kosova dhe më gjerë, duke i fuqizuar ata me mjetet e nevojshme për t’u bërë zë i ndryshimit. Tani, po e zgjerojmë këtë lëvizje dhe kemi nevojë për ju! Së bashku, mund ta ndërtojmë një lëvizje feministe më të fortë dhe më gjithëpërfshirëse – një lëvizje që fuqizon zërat, ndikon në politika dhe hap rrugën për një të ardhme më të drejtë dhe të barabartë. Programi ynë i Vullnetarëve gjithashtu ofron mundësi për të përmirësuar dhe/ose zhvilluar aftësi të reja në hulumtim dhe punë të tjera për të drejtat e grave.

Nëse jeni të interesuar të bëheni vullnetarë në RrGK, ju lutemi plotësoni formularin e aplikimit më poshtë.

Kjo është mundësia juaj për t’u bërë pjesë e diçkaje më të madhe. A do të na bashkoheni?