Igballe Rogova, Drejtore Ekzekutive e RrGK hapi mbledhjen duke u dëshiruar mirëseardhje të pranishmeve. Ajo më tutje njoftoi për ecurinë e agjendës dhe për prezantimet që do të bëheshin.

            Avis Benes, Udhëheqëse e Njësisë së Informacionit dhe Komunikimit Publik dhe Silke Studzinsky, Udhëheqëse e Zyrës së Pjesëmarrjes së Viktimave nga Dhomat e Specializuara të Kosovës (DhSK) bënë dy prezantime lidhur më vështrimin, përgjegjësitë dhe funksionin e Dhomave të Specializuara dhe skemën e pjesëmarrjes së viktimave. Znj. Benes tregoi në detaje lidhur me historikun e DhSK, të cilat janë institucione gjyqësore të përkohshme që kanë juridiksion vetëm mbi individë. Mandati i tyre është gjykimi i pretendimeve për krime kundër njerëzimit, krime lufte dhe krima tjera të kryera gjatë periudhës 1 janar 1998 – 31 dhjetor 2000 që kanë lidhje me pretendimet e përmendura në Raportin e Asamblesë së Këshillit të Evropës të vitit 2011.

            Tutje gjatë prezantimit u tha se DhSK synon që të informojë publikun drejtë duke dashur të parandalojë informacionet e rreme dhe të pasakta. Këtë fokusohen ta bëjnë përmes prezantimeve, diskutimeve në panele, ligjëratave në univesitete, duke bashkëpunuar me organizatat joqeveritare dhe organizatat e shoqërisë civile. Pas diskutimeve dhe seancës së pyetjeve e përgjigjeve, Znj. Benes u shpreh se “Ne do të punojmë shumë dhe do të mundohemi që mos të ndërhyjë asnjëherë politika në proceset tona për drejtësi”.

Pasdite, koha ishte e rezervuar për prezantimin e Projektit të financuar nga Bashkimi Evropian “Lëvizja përpara: Promovimi i efikasitetit dhe efektivitetit më të madh në Luftën Kundër Trafikimit me Qenie Njerëzore në Kosovë”. Ky projekt është një përpjekje e përbashkët e Qendrës për Kujdes Familjar dhe Fëmijë (KMOP), Organizatës Evropiane për të Drejtën Publike (EPLO) dhe Qendrës për Mbrojtjen e Viktimave dhe Parandalimin e Trafikimit të Qenieve Njerëzore (PVPT) që synon të avancojë më tej koordinimin e përgjithshëm të Anti- Trafikimi në Kosovë, si dhe mënyra se si hetohen dhe ndiqen krimet e trafikimit, viktimat dhe dëshmitarët të mbrohen si dhe ofrimi i shërbimeve të planifikohet, menaxhohet dhe zbatohet në bashkëpunim me sektorin e shoqërisë civile. Sadete Kastrati, Eksperte e Granteve në KMOP, njoftoi për Thirrjen për Projekt-Propozime që është shpallur.

Më tej, Iliriana Banjska, Analiste e Çështjeve Gjinore në RrGK, njëherësh edhe bashkë-autore, prezantoi të gjeturat dhe rekomandimet të dalura nga raporti më i ri i RrGK-së, “Kujdes me PVGJ-në”, të cilin znj. Banjska dhe Nicole Farnsworth e prezantuan gjatë muajit janar edhe në Bruksel para zyrtarëve më të lartë të Komisionit Evropian. Ky raport e ilustron zbatimin e Planit të Veprimit Gjinor të Bashkimit Evropian dhe mangesitë e këtij procesi në Balkanin Perëndimor. Raportin e plotë mund ta lexoni në faqen e internetit të RrGK-së.

Pas prezantimeve, anëtaret njoftuan lidhur me aktivitetet e tyre me ç’rast Fazile Bungu nga Shoqata Hendifer njoftoi që edhe në Ferizaj do ta shënojnë 8 marsin me marsh. Fikrije Ferizi, nga Shoqata e Gruas ATO, Vushtrri, njoftoi se në Vushtrri do të organizohet një tyrezë e rrumbullakët për të shënuar 8 marsin. Gjejrane Lokaj nga Shoqata Iniciativa e Grave, Dragash, njoftoi se edhe në Dragash do të shënohet 8 marsi me peticionin që do ta organizojnë, bashkë me anëtaret e Lobit, për hapjen e materniteve. Ndërkaq, Nevenka Rikallo nga Shoqata Ruka Ruci ndau mirënjohje për Igballe Rogovën dhe Yllka Sobën për përkrahjen dhe kontributin e dhënë në procesin e hapjes së strehimores në Novobërdë.

Gjithashtu, znj. Rogova njoftoi se në me 27 – 29 prill, përkrahur nga Fondacioni Kvinna till Kvinna dhe me participim vetanak, RrGK do të mblidhet me anëtaret në Durrës për të punuar në zhvillimin dhe hartimin e Strategjisë së re të RrGK-së. Ndërkaq, ajo shtoi se takimi i rregullt i radhës do të mbahet në muajin qershor. Meqë në qershor është edhe dita botërore e dhurimit të gjakut, RrGK do të organizojë që gjatë takimit të bëhët edhe dhurimi i gjakut si aktivitet vullnetar.

 Një çështje tjetër që u diskutua me anëtaret ishte propozimi i dy emrave, një anëtare e RrGK-së dhe një ekspert i jashtëm, të cilët do të jenë pjesë e Komisionit për Vlerësimin e Granteve në Fondin e Grave të Kosovës. Raundi i rradhës do të hapet sapo të nënshkruaj RrGK kontratat me donatorët.

Anëtaret u njoftuan dhe u ftuan të bashkangjiten edhe në marshin që do të organizohet nga Kolektivi Marshojmë S’festojmë me 8 mars në orën 12:00 në sheshin Zahir Pajaziti.

            Kjo mbledhje është realizuar pjesërisht me mbështetjen e Fondacionit Kvinna till Kvinna dhe pjesërisht nga Dhomat e Specializuara të Kosovës.