Vajzat diskutuan për problemet dhe çështjet me të cilat ato përballen në jetën e tyre të përditshme në Mitrovicë dhe strategjitë e tyre për të tejkaluar këto dukuri, përfshirë çasjen e vajzave në edukim, martesat e hershme, konfliktin ndërmjet gjeneratave dhe vështirësitë për tu përfshirë në pozita vendim-marrëse.

“Ky takim na ofroi ide të qarta për tejkalimin e vështirësive me të cilat ne si vajza përballemi sot,” tha një pjesëmarrëse. “Poashtu na mësoi se sa e rëndësishme është që të mblidhemi më shpesh dhe të shkëmbejmë përvoja.”

Vajzat besojnë se hapi i parë drejt tejkalimit të këtyre problemeve është ngritja e vetëdijes në mes të vajzave dhe gjeneratave të vjetra, si dhe organizimi i shkëmbimeve të përvojave ndërmjet gjeneratave. Ato u inkurajuan që të vazhdojnë të mendojnë për ide dhe mënyra të zgjidhjes së çështjeve me të cilat ato përballen. Ato do të sjellin idetë e tyre për diskutim në takimet e radhës.

IFV doli nga interesimi i anëtareve të RrGGK për të çuar përpara qëndrueshmërinë e organizimit të grave në Kosovë. Ajo ka për qëllim të përfshijë më shumë vajza në lëvizjen e grave të Kosovës duke i fuqizuar ato që të avokojnë për shqetësimet dhe nevojat e tyre.

Ky takim erdhi pas diskutimeve paraprake të mbajtura në Prizren dhe Gjilan. IFV mbështetet nga Kvinna till Kvinna.