Duke u zgjeruar nga rajoni në nivel global, Rrjeti Mbikëqyrës i Buxhetit Gjinor (GBWN) shënoi një moment historik gjatë Takimit Vjetor në Veles, Maqedoni të Veriut. Takimi mblodhi së bashku anëtarë të ndryshëm për të festuar arritjet e Rrjetit dhe për të përcaktuar rrugën drejt të ardhmes. Një moment kyç ishte miratimi i Statutit të përditësuar, duke e shndërruar zyrtarisht GBWN nga një nismë rajonale në një lëvizje globale për avancimin e buxhetimit të përgjegjshëm gjinor (GRB).

Rrjeti i Grave të Kosovës (RrGK), një partner i kahershëm i GBWN, prezantoi gjatë takimit Strategjinë e re të Rrjetit. Pas një procesi konsultativ me anëtarët dhe partnerët që zgjati më shumë se një vit, Strategjia e propozuar u hodh në votim dhe u miratua unanimisht, duke vendosur një themel të fortë për zhvillimin dhe rritjen e mëtejshme të Rrjetit.

Pjesëmarrësit gjithashtu morën pjesë në trajnime praktike mbi monitorimin e orientuar në rezultate dhe përdorimin efektiv të rrjeteve sociale. Këto sesione u përqendruan në formulimin e mesazheve me ndikim për audienca të ndryshme, duke përfshirë vendimmarrësit, mediat dhe publikun e gjerë, ndërsa shfrytëzonin tregimin e të dhënave për të rritur dukshmërinë dhe ndikimin e avokimit për GRB.

Programi eksploroi më tej ndërthurjen mes teknologjisë dhe avokimit përmes një punëtorie mbi inteligjencën artificiale dhe mjetet dixhitale për organizatat e shoqërisë civile. Ky sesion i ofroi anëtarëve njohuri mbi mënyrat se si përparimet në IA mund të mbështesin avokimin jofitimprurës, duke nxitur inovacionin në përpjekjet e tyre për të promovuar barazinë gjinore.

Dita e fundit e takimit krijoi një hapësirë për anëtarët që të ndanin pritshmëritë dhe nevojat e tyre, si dhe punën që po realizojnë aktualisht në GRB. Ky diskutim i hapur theksoi mundësitë për bashkëpunim dhe mënyrat se si GBWN mund të mbështesë më mirë iniciativat e anëtarëve të tij. Ishte një moment reflektimi dhe planifikimi kolektiv, që forcoi kapacitetet e Rrjetit për të bërë përparime domethënëse në nivel global..

Nëse dëshironi të bëheni anëtar i GBWN, mund të regjistroheni këtu: https://gbwn.net/en/registration/

Për më shumë informacione mbi GBWN, ju lutemi kontaktoni Elirjeta Beka (elirjeta@womensnetwork.org).

Mbështetur nga Agjencia Austriake për Zhvillim dhe Sida – Styrelsen för Internationellt Utvecklingssamarbete.