Rrjeti i Grave të Kosovës shton perspektivën gjinore në rrugën e Kosovës drejt Bashkimit Evropian. Në përputhje me raportin e Komisionit Evropian të vitit 2024 për Kosovën, RrGK dha komentin e saj për Programin e Integrimit Evropian të Kosovës për 2025-2029.
Programi Kombëtar për Integrim Evropian (PKIE) është plani kryesor i Kosovës për reformat drejt anëtarësimit në BE. Ai synon përshtatjen e ligjeve vendase me ato të BE-së dhe është programi i tretë me këtë emër dhe i dhjeti që nga hyrja në fuqi e Marrëveshjes së Stabilizim-Asociimit (MSA).
RrGK ka vërejtur se programi nuk ka tregues të qartë, synime të matshme dhe baza fillestare, gjë që e vështirëson matjen e progresit. Po ashtu, mungojnë objektivat për marrëdhëniet me fqinjët, bashkëpunimin rajonal dhe normalizimin Kosovë-Serbi, si dhe për zbatimin e Agjendës së BE për Gratë, Paqen dhe Sigurinë.
Sugjerojmë përfshirjen e këtyre elementeve për një monitorim më të mirë dhe më shumë llogaridhënie në procesin e integrimit.
