Më datë 09 tetor 2025, Organizata e Personave me Distrofi Muskulare të Kosovës (OPDMK) mbajti një infosesion në Komunën e Prizrenit me persona me aftësi të kufizuara dhe asistentë personalë, lidhur me qasjen në shërbimet sociale dhe familjare, dhe procedurat e paraqitjes së ankesave.

Aktiviteti u realizua në kuadër të projektit “Përmirësimi i kapaciteteve të shoqërisë civile për të rritur qasjen në mbrojtje sociale cilësore për gra dhe burra të ndryshëm”, i cili financohet nga Programi i BE-së për Shoqëri Civile (EU CSF) dhe zbatohet nga Rrjeti i Grave të Kosovës (KWN), në partneritet me OPDMK dhe Organizatën Ruka Ruci.

Gjatë kësaj seance, pjesëmarrësit u njohën me shërbimet ekzistuese, reformat e fundit në këtë fushë dhe mekanizmat institucionalë që ofrojnë mbështetje për qytetarët në nevojë. Ata patën mundësinë të mësojnë se si të qasen në shërbimet e mbrojtjes sociale dhe të përdorin platformat digjitale online. Një segment i veçantë iu kushtua platformës E-Kosova, ku pjesëmarrësve iu tregua se si të krijojnë llogari dhe të përdorin format online, duke inkurajuar përdorimin më të gjerë të zgjidhjeve digjitale.

Pjesëmarrësit u informuan për procedurat e aplikimit për asistencë sociale dhe rrugët për paraqitjen e ankesave në rast të pengesave apo trajtimit të padrejtë në institucionet publike. Diskutimet nxorën në pah rëndësinë e njohjes së të drejtave sociale dhe ligjore si një mjet për të ndikuar në përmirësime konkrete në nivel lokal dhe institucional.

Infosesioni përfshiu edhe ushtrime praktike, shembuj konkretë dhe lojë me role, që ndihmuan pjesëmarrësit të kuptojnë më mirë proceset administrative dhe të zhvillojnë aftësi për t’i adresuar çështjet e tyre në mënyrë të pavarur.

Gjatë diskutimeve interaktive, pjesëmarrësit ndanë përvojat e tyre personale, duke përfshirë sfidat në qasjen në shërbimet sociale dhe në marrjen e njohjes zyrtare të statusit të aftësisë së kufizuar. Ata theksuan vonesat e shpeshta në shqyrtimin e rasteve, mungesën e transparencës dhe mungesën e informacionit të mjaftueshëm nga institucionet përgjegjëse.

Në fund të aktivitetit, u dhanë rekomandime konkrete për përmirësimin e qasjes së personave me aftësi të kufizuara në shërbimet publike dhe digjitale, duke theksuar nevojën për bashkëpunim të vazhdueshëm ndërmjet institucioneve publike dhe organizatave të shoqërisë civile.

Ky aktivitet shënon një hap të rëndësishëm drejt përfshirjes më të gjerë dhe barazisë në qasjen në mbrojtje sociale, duke reflektuar përkushtimin e KWN-së dhe OPDMK-së për të fuqizuar qytetarët dhe për të ndërtuar një shoqëri më gjithëpërfshirëse dhe më të drejtë për të gjithë.