Në një botë ku një pjesë e madhe e jetës së të rinjve zhvillohet online, kufiri mes dhunës digjitale dhe asaj në jetën reale po bëhet gjithnjë e më i paqartë për tu parë. Përmes shfaqjes së teatrit forum “Prapa Ekranit”, Artpolis i ndihmon të rinjtë të njohin dhunën digjitale, të kuptojnë ndikimin e saj dhe të eksplorojnë mënyra se si mund të reagojnë, së bashku.
Pas shfaqjeve të mbajtura në Prishtinë, Pejë, Ferizaj, Gjakovë, Mitrovicë dhe Prizren gjatë vitit 2025, shfaqja do të vazhdojë të arrijë shkolla dhe komunitete të reja gjatë vitit 2026. Kapitulli i ri ka nisur më 12 shkurt në Vushtrri dhe do të vazhdojë në Gjilan (4 mars), Rahovec (18 mars), Dragash (8 prill), Skenderaj (22 prill) dhe Viti (13 maj), duke zgjeruar diskutimin dhe duke arritur të rinjtë aty ku këto çështje kanë më së shumti rëndësi.
Shfaqja është pjesë e iniciativës së Artpolis “Adresimi i Dhunës me Bazë Gjinore në Kosovë përmes Forum Teatrit”, e cila synon rritjen e ndërgjegjësimit, parandalimit dhe raportimit të dhunës me bazë gjinore (DHBGJ), veçanërisht dhunës së lehtësuar nga teknologjia (TFDHBGJ).
E vendosur në ambientin universitar të Kosovës, shfaqja “Prapa Ekranit” ndjek historinë e Krenarit, Dafinës, Leas, Ardit dhe profesoreshës Drita, teksa përballen me presionet e një bote të formësuar nga imazhe, pëlqime dhe video që promovojnë modele toksike të dashurisë, pushtetit dhe dëshirës. Përmes formatit interaktiv të teatrit forum, Artpolis fton publikun të bëhet pjesë aktive e shfaqjes, duke u angazhuar drejtpërdrejt me personazhet, duke ndalur skenat dhe duke propozuar zgjedhje alternative. Kjo qasje u mundëson të rinjve të eksplorojnë në mënyrë praktike realitetet e dhunës online, manipulimit dhe abuzimit, si dhe të reflektojnë e diskutojnë këto çështje të ndjeshme, por thelbësore, dhe mënyrat e reagimit ndaj tyre.
Deri më tani, nxënësit kanë bërë pyetje hapur dhe kanë ndarë përvojat e tyre personale lidhur me presionin dhe manipulimin online. Ata kanë folur gjithashtu për sfidat e raportimit të dhunës, veçanërisht kur ajo përfshin persona që i njohin. Këto diskutime ndihmojnë në normalizimin e bisedave rreth dhunës digjitale dhe përforcojnë mesazhin se ekziston mbështetje.
Teksa shfaqja vazhdon të arrijë më shumë shkolla, qëllimi i saj mbetet i qartë: t’i ndihmojë të rinjtë të ndihen të informuar, të mbështetur dhe të sigurt për të folur hapur.
Ky aktivitet realizohet nga Artpolis në kuadër të një projekti të zbatuar nga East-West Management Institute (EWMI) dhe Rrjeti i Grave të Kosovës (KWN). “Prapa Ekranit” është me regji dhe dramatizim nga Zana Hoxha.
