Qëllimi i realizimit të projektit “Kujdesi shëndetësor është i mirë atëherë kur ka qasje për të gjithë” është përmirësimi i kujdesit shëndetësor për gratë dhe vajzat me nevoja të veçanta si dhe për personat me distrofi muskulare në përgjithësi. Po ashtu, ky projekt ka për synim ngritjen e vetëdijes së institucioneve komunale dhe atyre shëndetësore për të siguruar qasje më të lehtë në shërbime cilësore për gratë dhe vajzat.

Në komunën e Prizrenit janë 34 persona me distrofi muskulare, prej të cilëve 24 janë gra dhe vajza në karrocë. Sfida më e madhe është shëndeti i këtyre grave dhe vajzave me nevoja të veçanta për të cilat kujdesen në të shumtën e rasteve nënat dhe motrat e tyre me njohuri shumë të limituara për të ofruar edhe kujdes shëndetësor, duke shtuar këtu edhe stigmat në familje, shoqëri dhe institucione. Për shkak të gjendjes së tyre fizike, gratë dhe vajzat me nevoja të veçanta kanë më shumë predispozita të vuajnë nga sëmundje të ndryshme përcjellëse, prandaj mungesa apo vonesa e kujdesit shëndetësor mund të shkaktojnë pasoja të rënda në jetën e tyre. 

Njëra nga të pranishmet theksoi se “Ka shumë raste kur edhe doktorët e kryesisht stomatologët nuk i pranojnë fëmijët me nevoja të veçanta për shkak të frikës së keqësimit të gjendjes së tyre, dhe kjo bën që ne të kërkojmë ndihmë tek doktorët privat ku shpesh herë edhe prej tyre refuzohemi”.

Të pranishmeve ju nda nga një pyetësor me pyetje për personat me distrofi muskulare si dhe për familjarët të cilët kujdesën për ta. Shumica e përgjigjjeve ishin se me së shumti kujdeset nëna dhe motrat pasi që baballarët në të shumtën e rasteve janë në punë. Ndërkaq kur bëhej fjalë për dhimbjet përgjigjet ishin se “provojnë të durojnë deri sa dhimbja të jetë e padurueshme”.

Resma, anëtare e organizatës dhe njëherit person me distrofi muskulare theksoi se “shpesh babai i saj thotë ajo e duron dhimbjen më shumë se krejt ne”, përderisa për ciklet menstruale vajzat ndihen të lira ti diskutojnë vetëm me nënën apo motrat e tyre. “Reagimi i prindërve ndaj një shqetësimi sa do të vogël shëndetësor është tepër i madh sa që nganjëherë “teprohet nga kujdesi”” u shpreh një vajzë tjetër pjesëmarrëse.

Duke diskutuar kështu shumë probleme me të cilat ballafaqohen, personat me distrofi muskulare dhe familjarët e tyre shpresojnë që do të punohet më shumë me këtë kategori të shoqërisë me qëllim të integrimit sa më të mirë të tyre në shoqëri, me theks të veçantë në punësim dhe shkollim.

Ky projekt mbështetet nga Fondi i Grave të Kosovës (FGK) dhe financohet nga Agjensioni Austriak  për Zhvillim (ADA).