Pse gratë, pavarësisht arritjeve dhe potencialit të tyre, mbeten ende të nën-përfaqësuara në shkencë dhe akademi – dhe si mund të ndryshohet kjo?

Më 31 mars, drejtoresha ekzekutive e Rrjetit të Grave të Kosovës (RrGK), Igballe “Igo” Rogova, u ftua në Akademinë e Shkencave dhe Arteve të Kosovës (ASHAK) për një tryezë të rrumbullakët me temën “Avancimi i grave dhe vajzave në shkencë dhe akademi në Kosovë”.

Ngjarja u organizua në një kontekst të mungesës së vazhdueshme të përfaqësimit të grave me tituj të lartë akademikë në pozita udhëheqëse institucionale, si dhe në fushat e Shkencës, Teknologjisë, Inxhinierisë dhe Matematikës (STEM).

Pjesëmarrësit u mblodhën për të diskutuar masa konkrete për tejkalimin e barrierave strukturore, paragjykimeve gjinore dhe qasjes së kufizuar në mentorim dhe rrjete profesionale për gratë dhe vajzat në Kosovë, me qëllim që arsimi dhe potenciali i tyre të shndërrohen në mundësi të barabarta dhe avancim në shkencë dhe akademi.

Tryeza e rrumbullakët u organizua nën udhëheqjen e presidentes së ASHAK-ut, Justina Shiroka-Pula, me mbështetjen e UN Women në Kosovë.