Gjatë muajit shtator Rrjeti i Grave të Kosovës (RrGK) ka vazhduar aktivizmin dhe përpjekjen për luftimin e dhunës me bazë gjinore.  

Më 11 shtator, RrGK ka dënuar therjen me thikë të një gruaje në Skenderaj nga burri i saj. 

“Çka pas këtij veprimi të institucioneve? Deri kur do të sillemi sikur dhuna ndaj grave është vetëm një lajm më shumë?  Çfarë drejtësie e pret këtë grua? Nuk do të jetë drejtësia e Donjeta Pajazitajt, Valbona Markut dhe vajzës së saj të mitur, apo drejtësia e së ndjerës S.M që në korrik të këtij viti u vra nga burri i saj në Kamenicë.” thuhet në një pjesë të kumtesës së dërguar në këtë datë.   

Lexo kumtesën e plotë KËTU.  

Ndërsa, tri ditë më pas, më 14 shtator, Gjykata Themelore e Gjakovës uli dënimin për Pjetër Ndrecaj, për vrasjen e bashkëshortes së tij, Valbona Marku, dhe vajzës së tyre në gusht të vitit 2018, në vetëm 24 vite e gjysmë burg.  

Këtë vendim, RrGK e kundërshtoi me një kumtesë për media, të cilën mund ta lexoni KËTU. 

Për më tepër, më 16 shtator, me distancë fizike, maska e numër të pakët të pjesëmarrësve për shkak të kërkesës së Policisë së Kosovës, RrGK ka ngritur edhe një herë zërin kundër dhunës ndaj grave në Kosovë.   

“Mos i jep zemër dhunuesit”, “Nuk ka arsyetim”, “Sa herë po doni me na vra”, janë disa prej parullave që stafi i RrGK-së mbante në duar në aksionin e organizuar para Prokurorisë në Prishtinë për të ngritur zërin kundër dhunës e vrasjes së grave dhe kundër dënimeve të ulëta që institucionet po shqiptojnë për vrasësit e grave.    

Lexoni KËTU storien e plotë lidhur me këtë protestë. 

KËTU mund të ndiqni transmetimin e drejtpërdrejt të këtij aksioni të RrGK-së.    

Nëse njihni dikë që ka përjetuar dhunë dhe rasti nuk ka marrë trajtim të duhur institucional ju lutemi ndjehuni të lirë të kontaktoni me ne.