Njihuni me Dianën e cila përmes kreativitetit të saj promovon barazinë gjinore

Diana është praktikante e re në RrGK, e cila ka për qëllim ta përdorë dizajnin grafik si mjet për
të përcjellë mesazhe ndërgjegjësuese tek një audiencë më e gjerë. Përkrahur nga fondi “Cathy
Frischmann” që mundëson punë praktike për aktivistet për të drejtat e grave, përfshirja në RrGK
ishte një hap i natyrshëm për Dianën, duke e lejuar atë të kombinonte dashurinë e saj për
dizajnin.
Me një dhunti të lindur për kreativitet dhe një sy të mprehtë për detaje, Diana zgjodhi të ndjekë
studimet në dizajn grafik, duke e parë atë si një mjet të fuqishëm për avokim dhe ndikim. E
nxitur nga dëshira e saj për të bërë ndryshime, ajo e gjeti veten në botën e artit digjital dhe
komunikimit vizual. Tashmë një studente e përkushtuar që ndjek pasionin e saj për dizajnin,
Diana ka bashkuar talentin e saj krijues me angazhimin për aktivizëm në shoqëri.
“Rrjeti i Grave të Kosovës është organizatë e cila përfaqëson shembulin më të mirë se si me
shumë punë dhe përkushtim mund të arrihen rezultate konkrete për forcimin e pozitës së gruas
në shoqëri. Unë kam konsideruar se duke qenë pjesë e një organizate kaq serioze dhe të
suksesshme është mundësi e jashtëzakonshme që të zhvillohem profesionalisht dhe të
shfrytëzoj shktathtësitë e mia për të ndihmuar në kauzën e përbashkët.” – përgjigjet Diana në
pyetjen se pse ka zgjedhur t’i bashkohet ekipit tonë.
Ajo është e vendosur të përdorë aftësitë e saj për të krijuar një botë më të drejtë dhe më të
barabartë për të gjithë. Nga posterat që provokojnë mendime deri te fushatat tërheqëse të
mediave sociale, puna e Dianës jo vetëm që shfaq aftësitë e saj teknike, por gjithashtu
mishëron përkushtimin e saj të palëkundur për të avancuar të drejtat e grave.
“Përmes dizajnit, synoj të rris ndërgjegjësimin dhe të frymëzoj veprime konkrete për barazinë
gjinore. Dua të përdorë aftësitë e mia kreative në mënyrë që të promovojë çështjet e
rëndësishme sociale dhe të kontribuojë në ndërtimin e një shoqërie më të drejtë dhe të
barabartë” shprehet ajo.
Nga përfshirja e deritanshme, ajo ka pasur mundësinë të bashkëpunojë me individë që ndajnë
botëkuptimet e njejta, të marrë pjesë në diskutime përmbajtësore dhe të kontribuojë me talentin
e saj në iniciativat që synojnë sfidimin e stereotipeve, promovimin e gjithëpërfshirjes dhe
avokimin për ndryshimin e politikave. Diana shpreson se kjo përvojë do të nxjerrë në pah të
gjithë potencialin e saj dhe do të shërbej si udhërrefyes në rrugëtimin e saj si dizajnere dhe
aktiviste.
Ne si ekip i urojmë Dianës punë të mbarë në RrGK, me bindjen se me kreativitetin dhe
përkushtimin e saj, ajo do të arrijë të ndikojë dukshëm në mbrojtjen e të drejtave të grave dhe
promovimin e barazisë gjinore në Kosovë dhe më gjerë.
Angazhimi i Dianës në RrGK u bë i mundur nga fondi “Cathy Frischmann” punë praktike për
aktivistet për të drejtat e grave. Cathy Frischmann (1952-2023) ishte një aktiviste për të drejtat e
grave, feministe, mbrojtëse e të drejtave të njeriut, mobilizuese për angazhimin e grave në
politikë, botaniste që mbronte bimët vendase dhe shumë më tepër… Cathy e donte jetën
prandaj edhe ia kushtoi atë mbrojtjes së të drejtave dhe jetës së të tjerëve. Ajo punoi
vazhdimisht për ta bërë botën një vend më të mirë. Cathy ndërroi jetë nga kanceri në vitin 2023.
Dashuria e Cathy-t për Kosovën nisi në vitin 2004, duke takuar organizatat anëtare të Rrjetit të
Grave Kosovës, për të vazhduar edhe sot kur ajo nuk është më, por na la trashëgimi fondin për punë praktike në emër të saj. Në këtë frymë, RrGK do të hapë thirrje çdo vit dhe do të vazhdojë
të frymëzojë gjeneratat e reja të aktivisteve për të drejtat e grave.