Me 14 nëntor afër 90 përfaqësuese të organizatave anëtare, partnerë dhe mbështetës të punës së Rrjetit të Grave të Kosovës (RrGK), kanë zhvilluar një takim gjatë të cilit u prezantua Rregullorja dhe Kodi i Mirësjelljes së Kuvendit të Anëtarësisë dhe u diskutua Finalizimi i Strategjisë së RrGK për vitet 2023-2026.
Igballe Rogova, Drejtore Ekzekutive, RrGK, gjatë fjalës së hapjes, foli për publikimin e librit “Fakte dhe Fabula”, i cili siç u shpreh ajo, është një historik i aktivizmit të grave në Kosovë, kur solidariteti ishte forca më e madhe për të shtyrë përpara agjendën e grave.
Sot kur rrjeti i ka 190 organizata, ajo theksoi rëndësinë e rikthimit të rregullores së përditësuar të anëtarësisë, si mekanizëm i rëndësishëm dhe i nevojshëm.
Ajo gjithashtu foli për punën, arritjet dhe avokimet e bëra gjatë gjithë zbatimit të Strategjisë së RrGK-së për vitet 2019-2022.
Ndërsa, Donjeta Morina, eksperte gjinore, ka prezantuar objektivat dhe rezultatet e pritura te strategjisë së re të RrGK-së.
Në pjesën e dytë të takimit pjesëmarrëset kanë punuar për të finalizuar objektivat dhe rezultatet e pritura të strategjisë së re të RrGK-së, të ndara në grupe bazuar në katër programet e strategjisë:
- Përmirësimi i barazisë gjinore përmes sundimit të ligjit;
- Jeta pa dhunë me bazë gjinore;
- Fuqizimi ekonomik i grave dhe
- Edukimi që transformon normat gjinore
Strategjia e re e RrGK-së pritet të aprovohet gjatë Kuvendit të Rregullt Vjetor që mbahet në fund të vitit.
Ky takim u mbështet nga Agjencia Austriake për Zhvillim (ADA).
